"Lëvizja e lehtësuar në 6 vendet e Ballkanit Perëndimor me Karta Identiteti: Drejt një Marrëveshjeje Rajonale si mundësi për një rajon më të afërt, të ndërlidhur më mirë dhe me më shumë përfitime për qytetarët" - Ministria e Brendshme
Postuar më: 16/10/2020

“Lëvizja e lehtësuar në 6 vendet e Ballkanit Perëndimor me Karta Identiteti: Drejt një Marrëveshjeje Rajonale si mundësi për një rajon më të afërt, të ndërlidhur më mirë dhe me më shumë përfitime për qytetarët”

Procesi i Berlinit – Fjala e ministrit të Brendshëm Sandër Lleshaj, në mbledhjen e mbajtur online të ministrave të Brendshëm, organizuar nga Maqedonia e Veriut dhe Bullgaria

Ministri Lleshaj: Pandemia ka vënë në provë bashkëpunimin dhe solidaritetin mes vendeve tona

Ministri Lleshaj: Ngjarje të paprecedenta, duhet të përdoren si mundësi për të çuar më tej përpjekjet e përbashkëta dhe të koordinuara në përballimin e sfidave

Ministri Lleshaj: Bashkëpunimi rajonal ka qenë kryefjala e rrugës sonë evropiane, përfshirë inkuadrimin në Procesin e Berlinit

Ministri Lleshaj: Ndërsa qytetarët tanë lëvizin lirshëm me letërnjoftime dhe pa viza në të gjithë rajonin, ata ende humbin shumë kohë në pikat e kalimit kufitar

Ministri Lleshaj: Shqipëria ka marrëveshje me vendet e Ballkanit Perëndimor për lëvizjen e njerëzve vetëm përmes letërnjoftimit

Ministri Lleshaj: Jemi duke negociuar një marrëveshje të ngjashme me Serbinë, që shpresojmë ta finalizojmë sa më shpejt

“Lëvizja e lehtësuar në 6 vendet e Ballkanit Perëndimor me Karta Identiteti: Drejt një Marrëveshjeje Rajonale si mundësi për një rajon më të afërt, të ndërlidhur më mirë dhe me më shumë përfitime për qytetarët”

I dashur Oliver,
Të nderuar kolegë dhe pjesëmarrës,

më lejoni të përgëzoj Maqedoninë e Veriut dhe Bullgarinë për bashkë-kryesimin gjatë këtij viti të Procesit të Berlinit dhe për organizimin e këtij takimi.

Pandemia ka vënë në provë, për mirë apo për keq, bashkëpunimin dhe solidaritetin mes vendeve tona. Takimi i sotëm tregon se ngjarje të paprecedenta, si kjo pandemi, duhet të përdoren si një mundësi për të çuar më tej përpjekjet tona të përbashkëta dhe të koordinuara në përballimin e sfidave, të pa kufizuara prej kufijve.

Gjatë bllokimit, ne kemi parë se falë përpjekjeve të përbashkëta, kemi mundur të sigurojmë vijueshmërinë e furnizimeve me mallra jetike, të tilla si ilaçe, pajisje mjekësore, por edhe riatdhesimin e qytetarëve tanë të bllokuar jashtë vendit.

Bashkëpunimi rajonal ka qenë kryefjala e rrugës sonë evropiane, përfshirë inkuadrimin në Procesin e Berlinit. Deri më tani, ky bashkëpunim ka rritur besimin dhe qëndrueshmërinë në rajon, ka promovuar pajtimin dhe bashkëpunimin ekonomik rajonal, i cili është pjesë integrale e përpjekjeve tona për të siguruar përparimin socio-ekonomik dhe përballimin e sfidave të sigurisë.

Aktualisht, Shqipëria ka marrëveshje me vendet e Ballkanit Perëndimor në lidhje me lëvizjen e njerëzve vetëm përmes letërnjoftimit dhe aktualisht jemi duke negociuar një marrëveshje të ngjashme me Republikën e Serbisë, që shpresojmë ta finalizojmë sa më shpejt të jetë e mundur.

Ndërsa qytetarët tanë lëvizin lirshëm me letërnjoftime dhe pa viza në të gjithë rajonin, ata ende humbin shumë kohë në pikat e kalimit kufitar. Radhët e zgjatura gjatë kontrolleve në kufi, bëjnë të humbin shumë kohë dhe durim, por ato nuk e forcojnë me patjetër sigurinë tonë.

Prandaj, implementimi i “Pikës me një ndalesë” është një objektiv shumë i nevojshëm dhe aplikimi i tij do të na shpjerë drejt një eliminimi të plotë të kontrolleve kufitare. Ky do të ishte një kontribut i vërtetë për lirinë e lëvizjes, pa cenuar sigurinë tonë.

Ne përgëzojmë Këshillin e Bashkëpunimit Rajonal (RCC) për vullnetin e treguar për të lehtësuar një marrëveshje të mundshme për lirinë e lëvizjes dhe qëndrimin në vendet e Ballkanit Perëndimor.

Një marrëveshje e tillë përputhet me qëllimin tonë për të lehtësuar liberalizimin e mëtejshëm në lirinë e lëvizjes, tregtisë, shërbimeve dhe rrjedhës së kapitalit. Pa hequr pengesat për lëvizjen e lirë të njerëzve në rajon, do të jetë më e vështirë për të ecur përpara me MAP REA 2 (Plani Shumëvjeçar i Veprimit për një Zonë Ekonomike Rajonale në BP6; të heqim pengesat për të mundësuar qarkullimin e lirë të mallrave, shërbimeve, investimeve dhe kapitaleve).

Është e rëndësishme që një marrëveshje e tillë të përfshijë marrëveshjet ekzistuese dypalëshe dhe shumëpalëshe në rajon, të shmangë dublikimet me nismat e tjera ekzistuese dhe të japë rezultate pozitive dhe konkrete. Faleminderit.