Ministri i Brendshëm Sandër Lleshaj, në emisionin ‘Kjo Javë’ në News 24 - Ministria e Brendshme
Postuar më: 15/02/2020

Ministri i Brendshëm Sandër Lleshaj, në emisionin ‘Kjo Javë’ në News 24

Ministri i Brendshëm Sandër Lleshaj, në emisionin ‘Kjo Javë’ me Nisida Tufën në News 24 – VIDEO:

Ky akt normative ka moto të veten: ‘Ndiq paranë’, por diçka të tillë e bënte edhe ligji ‘Antimafia’ ku të dënuarve për vepra të rënda kriminale u sekuestronte dhe pasurinë. Çfarë do të sjellë të re ky akt normativ?

Ministri Lleshaj: Ky akt normativ është vetëm risi, për arsye se ka krijuar një instrument që nuk ka ekzistuar më parë. Ligji ‘Anti-mafia’ që ishte edhe është në fuqi, ka si objekt kryesor hetimin penal, procedimin penal të krimit dhe të pasurive të tij të marra se bashku. Ndërsa akti normativ i miratuar së fundi është një situatë që ka vetëm një qëllim, të karakterit administrativ, të adresojë, të konfiskojë dhe të sekuestrojë ato pasuri kriminale që nuk janë prekur deri tani për arsye të mungesës së instrumenteve ligjorë. Pra është një instrument krejtësisht i ri, nuk është instrument i karakterit penal, është një instrument i karakterit administrativ, i cili do të mundësojë që thjesht të verifikohen pasuritë e gjithkujt që është dënuar për një numër të caktuar veprash penale, dhe pastaj është atribut i SPAK-ut dhe i Gjykatës Kundër Korrupsionit dhe Krimit të Organizuar të cilët do të vendosin se çfarë të bëhet me të. E reja tjetër këtu është që barra e provës, i takon atyre që janë të dënuar apo që janë subjekt i ligjit. Pra, policia nuk ka barrë prove, ka vetëm detyrën të evidentojë dhe ta referojë rastin në procedurën përkatëse dhe këtu mbyllet gjithë historia dhe roli i policisë.

Pse është policia kaq e sigurt se do ja marrë asetet nga duart krimit përsa kohë do të jetë përsëri Prokuroria ose Gjykata që do të vendosë?

Ministri Lleshaj: Policia nuk është e sigurt që do t’ua marrë. Policia është e sigurt që do bëjë hapin e saj. Do bëjë pjesën e saj, se është një proces, që marrin pjesë së paku, tre institucione, policia, SPAK dhe Gjykata e Posaçme. Policia ka detyrën të evidentojë personat që janë subjekt i këtij ligji, të mbledh të dhënat e nevojshme lidhur me pasuritë e tyre, që i zotërojnë në mënyrë direkte apo të tërthortë dhe ta përcjellë këtë informacion në SPAK, pastaj është detyrë e SPAK dhe e Gjykatës, që të bëjë pjesën tjetër. Ne besojmë që procesi do të shoqërohet me kujdes, për arsye se këtu nuk bëhet fjalë të humbasim në labirente paragrafësh ligjore, siç ka ndodhur me ligjin Antimafia, që kurrë nuk prodhoi atë që duhej të prodhonte, për arsye se tani do të jenë vetë personat përkatës, pra subjekti i ligjit, që do të duhet ta provojnë në mënyrë objekti ve faktin që pasuria që kanë, ka rrjedhur prej të ardhurash të ligjshme. Nuk besoj se ka njeri në Shqipëri që mund të mendojë që pasuritë e jashtëzakonshme, që janë në duar personash të papunë, të pashkollë, të mund të jetë burim i të ardhurave në rrugë të ligjshme, megjithatë kjo është objekt i gjykatës. Policia do të bëjë vetëm pjesën e vet, evidentimin, dokumentimin dhe paraqitjes e gjithë dokumentacionit në prokurorinë përkatëse.

Nga lista e publikuar deri më tani shumica e subjekteve që u është kërkuar të deklarojnë pasurinë e tyre kanë patur vendime gjykatash për sekuestro. Përse duhet të kalohet në filtër përsëri pasuria e tyre?

Ministri Lleshaj: Ligji nuk parashikon që ne t’i kthehemi vendimeve të mëparshme, pra nëse gjykata është shprehur me një vendim për një pasuri të caktuar kjo çështje është e mbyllur dhe nuk është ky objekt i ligjit, por ka persona që mund të jenë subjekt i këtij ligji që mund të kenë një pronë apo dy të kaluar përmes një vendimi gjykate, të cilin nuk po e gjykoj se si është, por mund të kenë dhe 20 prona të tjera, që nuk i janë nënshtruar një verifikimi gjyqësor, dhe ky është objekti i saj. Pra, nuk ka dublikim të përpjekjes. Por, ka shumë pasuri që nuk i janë nënshtruar këtij procesi, por që do t’i nënshtrohen dhe ajo që është më e rëndësishme, ligji ka për subjekt jo vetëm personat e dënuar, por edhe personat e lidhur me ta, sepse ka mjaft të dhëna që shumë pasuri janë transferuar te persona të afërt apo të familjes, apo të tjerë, që do të detyrohen të paraqiten në gjykatë dhe ta justifikojnë, Ata personat e padënuar, por të lidhur me personat e dënuar dhe të justifikojnë burimin e pasurisë së tyre. Dhe është proces administrativ, askush nuk ka pse të ndihet i prekur, është një çështje administrative, pra, nuk do të shkosh si i pandehur, është një proces administrativ shumë i butë, që iu kërkon të gjithëve të shpjegojnë me qetësi të plotë, nga i kanë marrë ato pasuri që kanë.

Ky akt normativ ka afat deri në 31 dhjetor. Kur kanë kaluar 15 ditë nga operacioni konkretisht çfarë pasurish janë sekuestruar përveç atyre që lidhen me rastin Prenga të cilëve ju bë sekuestro me emergjencë me urdhër të drejtorit të përgjithshëm Ardi Veliu?

Ministri Lleshaj: Unë të them të drejtën nuk ndjek detajet e operacionit, është atribut i policisë së shtetit, por di që operacioni ka ecur sipas planit, është një numër as shumë i madh, por për kohën dhe momentin e fillimit, është një numër i pranueshëm subjektesh për të cilat janë adresuar dhe kanë filluar proceset përkatëse, ka ecur mirë, bëhet fjalë për shumë pasuri edhe pse janë pak subjekte, mund të numërohen mbi 10 dhe poshtë 20, kaq janë pak a shumë numri i atyre të përfshirë në këtë proces, por gjithsesi bëhet fjalë për pasuri të mëdha të cilat, shtojnë shumë pikëpyetje.

Pra, ju thoni se rezultatet kanë nisur të shihen që tani?

Ministri Lleshaj: Rezultat i prekshëm është vendimi përfundimtar i konfiskimit nëse do të ketë, dhe ky pritet të ndodhë brenda harkut kohor të 6 muajve, aq e ka kohën gjykata për t’u shprehur, por për policinë, që ka detyrën e parë që t’i paraqesë, procesi po ecën me ritëm të mjaftueshëm dhe të pranueshëm, por do të njohë një rritje shumë të madhe në ditët në vijim, për arsye se sapo u miratua ligji, sa u ngritën strukturat, sa të rakordohen elementët e operacionit, do ta marrë pak kohë, por në javët në vijim volumi i punës do të jetë disa fish më i lartë se sa është sot.

Kryeministri Rama njoftoi se së shpejti do të ngrihet një njësi e re policore e cila do të vazhdojë nismën kundër krimit të organizuar dhe korrupsionit. E bëri të ditur kete gjatë vizitës në Shtetet e Bashkuara por kjo u bë e ditur edhe nga vetë ju në Vlorë dje. Çfarë është kjo njësi?

Ministri Lleshaj: Jemi në proces diskutimi për të konfiguruar një strukturë tjetër të specializuar për krimin ekonomik dhe korrupsionin. Janë dy fusha që meritojnë një vëmendje të shtuar, për arsye se është përqendruar shumë energji në fushën e krimit, krimeve të rënda kryesisht, por konstatohet nevoja për të përmirësuar instrumentet në luftën kundër krimit ekonomik dhe korrupsionit. Janë figura krimi që kërkojnë një profil të ri policie dhe kërkojnë një bashkëpunim shumë më të lartë mes institucioneve. Është ndryshe të kërkosh një vrasës, dhe një person që bën evazion fiskal, këtu duhet një lloj tjetër policie, një profil tjetër arsimimi, trajnimi. Pra, duhet një qasje tjetër. Duhet të krijojmë kapacitet që na kanë munguar, na duhen policë, hetues, punonjës që dinë të futen në fushën e krimit të jakave të bardha, në kuptimin e krimit të sofistikuar të krimit ekonomik e financiar. Njerëz që kanë aftësi të investigojnë transaksionet. Kemi rekrutuar studentë të ekselencën nga ekonomia, financa, informatika, që kanë marrë trajnimin përkatës në fushën e hetimit. Përpara fundit të vitit do të jetë e kopsitur.

Prej një jave me urdhër të Drejtorit të Përgjithshëm të Policisë së Shtetit po Zhvillohet një operacion për automjetet e luksit dhe ato të blinduara. Si po shkon ky operacion?

Ministri Lleshaj: Edhe kjo është ndërthurur me “Forcën e Ligjit”. “Forca e ligjit” është e karakterit administrativ që ndodh në një shinë tjetër. Ndërsa kontrolli dhe puna e përditshme e Policisë për mbajtjen e parametrave të sigurisë së rendit dhe për luftën ndaj krimit në karakterin penal, është pjesa dhe puna kryesore e policisë. Pavarësisht se ka marrë vëmendje të madhe OFL-ja këto ditë, ajo nuk është e vetmja pjesë e Policisë së Shtetit. Policia e shtetit vazhdon në të gjithë dimensionin e saj. Ne kemi një vëmendje të shtuar të kontrolleve në fushën e rendit publik, sidomos për kontrollet e armëmbajtjes. Ende në Shqipëri qarkullojnë shumë armë pa leje. Ne vitin që shkoi e forcuam ligjin, kemi penalizuar rëndë armëmbajtjen pa leje dhe tani po kontrollojmë sesi po zbatohet. A ka armë në qarkullim apo jo. Herë pas here zhvillohen kontrolle të kësaj natyre. Në përgjithësi kontrollet kanë një objektiv. Shkeljen e rregullave të qarkullimit rrugor, që ende ndodh për fat të keq shumë dhe armëmbajtjen pa leje. Por kjo s’ka lidhje me OFL-në. është një detyrë e policisë. Përsa i përket mjeteve të blinduara, kjo ka lidhje me OFL-në për arsye se ligji i sapo miratuar i jep fuqi Policisë së Shtetit t’ua heqë autorizimin për mbajtjen e mjeteve të blinduara.

A është normale z. Lleshaj që policë të armatosur dalin në postblloqe në mes të ditës për të kryer kontrolle në një kohë që edhe vetë dogana mund ta bëjë këtë?

Ministri Lleshaj: Nuk është normale. Po. Duhet të ishte bërë që në dogana, por atje është bërë diçka tjetër. Që mjetet e blinduara kanë ardhur. Janë krijuar flota të tëra në dispozicion të personave më histori të rënda kriminale. Tashmë ka ardhur koha për ta riadresuar këtë çështje. Sigurisht që do të ishte mirë që në rrugët e vendit të mos dukej asnjë polic.

Sidomos të armatosur…

Ministri Lleshaj: Të armatosur dalin shumë rrallë. Dalin në rastet kur ka indicie apo sinjale që mund të ballafaqohen me njerëz të armatosur. Ne nuk mund ta lëmë as policinë që të futet në operacione e papërgatitur për arsye që ne dimë që kjo polici ka pësuar shumë në harkun e 30 viteve. Ka lënë shumë anëtarë të saj pre e sulmeve të armatosura nga bandit kriminale, por ajo që po ndodh është një përpjekje për të kontrolluar qarkullimin me armë në rrugët e vendit dhe qarkullimin e mjeteve që janë të paautorizuara, të blinduara.

A keni një bilanc të armëve të kapura deri tani?

Ministri Lleshaj: Bilanc nuk ka po ne kemi rezultatet që vitin që shkoi janë kapur 524 armë në rrugët e vendit. Pavarësisht se tani është e qartë që kodi penal nuk ka asnjë klauzolë apo nuk ka asnjë mundësi që të shpëtosh pa burg nëse kapesh me armë prapë ka njerëz që nuk e dinë këtë punë. Ka qenë një legjislacion tjetër. Vitin që shkoi ndryshoi legjislacioni, por duhet thënë që në rrugët e vendit ka njerëz që qarkullojnë me armë dhe nuk duhet të harrojmë që Shqipëria ka qenë një arsenal armësh më vete, që në ’97 morën rrugët dhe po bëjmë 20 vjet që nuk po mblidhen dot. Është një prioritet shumë i madh që ne do ta vazhdojmë po me atë intensitet edhe këtë vit. Përpjekja është për të mos shqetësuar asnjë qytetar dhe i ftoj qytetarët të kenë mirëkuptim në emër të sigurisë së tyre. Kontrollet bëhen për të shtuar sigurinë e qytetarëve normalë. Do përpiqemi për të balancuar mirë nevojën për të qenë konseguent ndaj kategorisë së qytetarëve që përdorin ose mbajnë armë pa leje me vete dhe në të njëjtën kohë për të qenë sa më pak shqetësues për qytetarët e tjerë. Ndonjëherë funksionon, ndonjëherë edhe nuk funksionon, se ne në rrugë policë shqiptarë nxjerrim. Nuk I marrim nga ndonjë planet tjetër. Ka raste që edhe vetë punonjësit e policisë çedojnë në performancën e tyre në rrugë. Këtu kërkojmë mirëkuptimin e qytetarëve por edhe reagimin e qytetarëve. Ne kemi SHÇBA-në që kontrollon punën e policisë në aktivitet të përditshëm për të parë sesi policia e bën punën e saj. Po e bën këtë punë me një kujdes të jashtëzakonshëm dhe vendosmëri të palëkundur.

Një problem shqetësues ka qenë edhe kanabisi. Si është situate tani me kanabisin? Kam këtu parasysh edhe denoncimet që vijnë nga kronikat në televizionin Italian?

Ministri Lleshaj: Situata me kanabisin në Shqipëri ka mbërritur në nivelin më të ulët në historinë e këtyre 30 viteve. Shqipëria ka patur një histori që fillon në vitin 91’, që ka kulmuar me Lazaratin ku kanabisi u shndërrua në një politikë shtetërore nëse I referohemi udhëheqësve politikë të kohës. Pati pastaj një rënie drejt minimumeve historike për shkak të një pune jashtëzakonisht të madhe që është bërë. Mund ta deklaroj sot me përgjegjësi të plotë që niveli i trafikimit të kanabisit në Shqipëri apo I trafikimit të kanabisit nga Shqipëria drejt vendeve të tjera është në minimumin historik. Nëse përmendet vetëm një shifër në raport me Italinë meqë e përmendët. Viti 2018 ka qenë një vit shumë I suksesshëm. Në vitin 2019, autoritetet italiane kanë kapur 6 herë më pak kanabis me origjinë nga Shqipëria krahasuar me vitin 2018, pa u marrë me vitet e mëparshme. Sipas vetë autoriteteve italiane, niveli I trafikimit të kanabisit nga Shqipëria në drejtim të Italisë, ka mbërritur në nivele pothuajse të papërfillshme, historikisht të papërfillshme. Përsa u përket kronikave që vijnë nga Italia unë e kam dhënë përgjigjen time. I konsideroj si të pavërteta dhe shpreh keqardhjen për ata që i kanë publikuar duke krahasuar gjëra të pakrahasueshme.

Sipas Kushtetutës, një akt normativ nxirret nga “Këshilli i Ministrave” në një situate emergjente. Cila ishte emergjenca në këtë rast ?

Ministri Lleshaj: Sipas Kushtetutës, konkretisht nenit 101 të saj, aktet normative janë atribut i qeverisë, për t’u nxjerrë në kushte nevoje dhe emergjence. Janë akte normative, jo me fuqinë e ligjit. Kush ishte emergjenca? Shumë herë është lakuar këto ditë një kontradiktë në argumentim sipas të cilës ne pretendojmë se krimi në Shqipëri është ulur dhe nga ana tjetër deklarojmë një emergjencë në këtë fushë. Në fakt këtu nuk ka asnjë lloj kontradikte. Është e vërtetë që krimi në Shqipëri, është ulur ndjeshëm krahasuar me të kaluarën e afërt dhe vendi ka sot parametrat më të mirë në fushën e sigurisë publike, por emergjente është një situatë që ka lindur një situatë e cila ka lindur për shkak të vettingut në sistemin gjyqësor.

Kjo është emergjenca. Për shkak të vettingut shumë gjyqtar që kanë parë tashmë se perspektiva e tyre brenda sistemit është mjaft e ulët dhe se ju e dini e kanë parë, që 50% e gjyqtarëve apo prokurorëve janë rrëzuar në procesin e vettingut, kjo gjendje ka dhënë një lloj parashikimi për shumë gjyqtarë që e di fare mirë seç kanë bërë në të kaluarën e tyre dhe po e shfrytëzojnë këtë kohë të mbetur, deri në ditën e vettingut, për të shfrytëzuar mundësitë për të bërë ato punë të pandershme që kanë bërë edhe më parë. Emergjenca është pikërisht kjo, po dalin nga burgu persona që normalisht duhet të ishin atje. Policia, shumë prej tyre që kanë dalë i llogariste që të ishin përjetësisht në burg, ndërkohë që kanë dalë. Dhe këta persona që kanë dalë nga burgu, falë vendimeve skandaloze, nuk është puna se kanë dalë dhe kanë ngel pa punë, apo lypës, po janë vënë në krye të bizneseve të tyre kriminale, që kanë qenë të paprekura dhe duke disponuar biznese të mëdha, duke disponuar resurse të mëdha materiale por edhe njerëzore, këta persona kanë krijuar një situatë që për gjykimin tonë është e papranueshme dhe duhet adresuar. Këtu është emergjenca. Emergjenca janë kriminelët që kanë dalë padrejtësisht nga burgu, falë vendimeve skandaloze.

Ju vetë z. Lleshaj në Kuvend në interpelancë jeni shprehur se siguria publike është në nivelet më të mira historike . . .

Ministri Lleshaj: Siguria publike në Shqipëri është nivelet më të mira në terma historikë, krahasuar me të kaluarën. Nëse e krahasoj me ambiciet tona, ajo nuk është shumë e mirë. Nëse e krahasojmë me atje ku duam të mbërrijmë, siguria publike ka nevojë për përmirësime të mëdha dhe për këtë jemi të ndërgjegjshëm. Po varet se nga e kthejmë kokën. Nëse e kthejmë kokën pas jemi më mirë se çdo ditë të së kaluarës tonë, po e kthyem kokën përpara, jemi më keq se ajo që duam të arrijmë. Ndaj nuk dua të krijojmë idenë që kemi arritur në një nivel euroforie. Jo nuk ka vend fare për eufori, ka vend për vetë-kritikë, por kjo është situata.

Z. Ministër, a është shkelje e nenit 98 të ligjit për Policinë e Shtetit që vajza civile e punësuar për të bërë PR-in e Operacionit Forca e Ligjit, shfaqet publikisht e veshur me uniformë dhe simbole të Policisë së Shtetit?

Ministri Lleshaj: Nuk ka shkelje të ligjit, për arsye se vajza nuk është e veshur me uniformë policie. Ajo mban simbole të Policisë së Shtetit dhe një kapele me sa kam parë unë dhe kaq. Uniforma është diçka tjetër, por s’ka asgjë të keqe që kushdo mund ta mbajë një simbol të Policisë së Shtetit. Ndodh rëndom në të gjithë botën që simbolet e policisë, ushtrisë i mbajnë edhe fëmijët, në çantat e shkollës, apo në makinë i vënë njerëzit. Përkundrazi, nuk ka asnjë shkelje këtu, madje do t’i inkurajoja, që të identifikohen pak me simbolet e policisë së tyre, edhe mund t’i përdorin ato, edhe mund t’i promovojnë. Por shkelje ligji këtu nuk ka në asnjë mënyrë.

Përse deklaratat e policisë flasin gjithmonë me iniciale për individët e botës së krimit. Ndërkohë që kemi vetë gazetarët që me zë dhe figurë i raportojnë këta persona me emra dhe mbiemra. Nga se druhet policia?

Ministri Lleshaj: Ky është një standard i Policisë së Shtetit për ruajtjen e privatësisë. Policia nuk ka bërë akuzë ndaj askujt. Policia ka bërë thjesht një proces administrativ. Kështu që policia tregohet e kujdesshme që këta njerëz të mos i bëjë objekt të, mos t’i paragjykojë vetë si polici në publik. Prandaj bëhet kjo, është thjeshtë çështje e ruajtjes së privatësisë së personave të cilët sipas policisë nuk janë të akuzuar. Ata janë persona të cilët kanë bërë krime, kanë bërë vepra penale. Janë jashtë akuzës penale. Këtu bëhet fjalë për një proces administrativ. Në të gjitha komunikatat e policisë, në të gjitha njoftimet mediatike të Policisë së Shtetit, nuk përmenden emra të plotë. Punohet përherë me inicialet.

Ky akt normativ ka patur mjaft kritika nga opozita. Dua të ndalem pak edhe tek kritikat e vetë Presidentit të Republikës zotit Meta. Ai është shprehur se krimi i organizuar nuk luftohet me fushata por me një punë të përditshme. Si do t’i përgjigjeshit kësaj zoti ministër?

Ministri Lleshaj: Në fakt unë nuk dua t’u përgjigjem akuzave, as të opozitës, as të Presidentit, sidomos akuzave të Presidentit. Nuk kanë vend fare sidomos në një kohë kur bëhet fjalë për një institucion shtetëror, pjesë e të cilit është edhe vetë Presidenti i Republikës. Dua të them një gjë, që sipas të gjithë indikatorëve që ne ndjekim për operacionin “Forca e Ligjit” dhe për ligjin në vetvete, ka një mbështetje shumë të gjerë publike, kjo është e matur. Madje një mbështetje e pazakontë e një publiku të gjerë, i cili pret jo sot por prej vitesh që të vendoset drejtësi në vend. Dhe ky është indikatori kryesor me të cilin ne merremi. Përsa kohë themi që kemi mbështetjen e publikut, dhe përsa kohë jemi të bindur që jemi brenda kornizës ligjore të miratuar, ne ecim përpara për realizimin e këtij objektivi të rëndësishëm. Sigurisht që i dëgjojmë edhe zërat kundër. Mundohemi t’i shpjegojmë atëherë kur duan të dëgjojnë. Për fat të keq ka edhe një kategori zërash kundër, të cilët nuk duan të dëgjojnë, thjesht duan të përcjellin një mesazh të kundërt. Nuk i mbyllim dot ato gojë, nuk kemi ç’u bëjmë, le të flasin.

Është publiku ai që do të gjykojë dhe do të jenë rezultatet që do të flasin. Megjithatë ne besojmë fort që ky hap i ndërmarrë paraqet një risi të jashtëzakonshme dhe paraqet një shans shumë të madh për vendin. Është shumë shumë e rëndësishme që ne të thyejmë dhe të shkatërrojmë një model kriminal biznesi që është krijuar në Shqipëri, i cili josh shumë të rinj në rrugë kriminale vetëm për faktin se demonstrojnë një mundësi suksesi pa punë. Djem të rinj të pashkolluar të pa përvojë, të vetmen gjë që kanë bërë, krimi…dhe ka të tjerë që e shohin këtë model. Dhe ky model josh, josh të rinjtë e tjerë në kushte të ngjashme, të pashkollë, të pa mundësi, të pa edukuar ashtu siç duhet, i josh ky model. Dhe nëse e shohin që: po! Ne mund të arrijmë ta kemi këtë vilë edhe pa punuar. Ka nga ata që I hyjnë kësaj rruge. Pikërisht këtë model duam të shkatërrojmë. Për t’u thënë të gjithë të rinjve të vendit tonë: Nuk ka shans që ti të bëhesh i pasur pa punuar. Nuk ka shanse që ti të kesh një makinë luksoze pa punuar e kështu me radhë. Ky është qëllimi i dytë i rëndësishëm i këtij ligji që të ndërtojmë një shoqëri ku modelet duhet të jenë pozitive, ku heronjtë duhet të jenë ata që punojnë dhe jo ata që s’punojnë.

Ka edhe akuza nga vetë ekspertët, njohës të mirë të ligjeve të cilët shprehen se ky akt normative ka mbivendosje të ligjeve dhe është në shkelje të kushtetutës?

Ministri Lleshaj: Sigurisht që për ligjin kanë punuar ekspertët. Se ekspertë këtu në Shqipëri janë një numër jashtëzakonisht I madh njerëzish që e quajnë veten të tillë. Ose analistë që është një lloj profesioni tjetër i krijuar në Shqipërinë e sotme, analistë pafund. Nuk kanë asnjë lidhje me çështjen dhe japin sqarime publike, e marrin përsipër ta bëjnë këtë gjë. Ligji i është nënshtruar një procesi shumë shumë të kujdesshëm diskutimi mes ekspertësh të mirëfilltë, vendas dhe të huaj. Një pjesë e madhe e kritikës nga aq sa kam parë unë vjen nga ata persona që as ligjin nuk e kanë lexuar dhe kjo më bën skeptik dhe nganjëherë indiferent ndaj një pjese të kritikës për arsye se kuptohet qartë që në fjalitë e para që nuk është lexuar as ligji. Dua ta përsëris deri në mërzitje ndoshta që ligji nuk është një instrument i ndjekjes penale. Nuk ka lidhje me korpusin penal të së drejtës në Shqipëri ose të së drejtës penale. Është një ligj i karakterit administrative. Nuk interferon fare me të gjitha institucionet e ndjekjes penale. Ky ligj mund ta kishte parashikuar që policia ta adresonte drejtpërdrejt gjykatave rastin, për arsye se janë raste të karakterit administrative.

Ligji parashikon një rol të shtuar edhe për Prokurorinë e Posaçme vetëm për të krijuar një instrument shtesë kontrolli mbi procesin duke patur në konsideratë sensibilitetin e lartë publik për ligjin. Për në thelb ky është një ligj i karakterit administrative, i cili nuk ka të bëjë fare me asnjë lloj çështje që lidhet me kushtetutën. Ky ligj kërkon nga një kategori subjektesh, personash të dënuar të bëjnë diçka që në një vend normal duhet ta bëjnë të gjithë qytetarët. Në një vend europian çdo qytetar është i detyruar të deklarojë çdo vit të ardhurat dhe shpenzimet e tij. Dhe nëse midis të ardhurave dhe shpenzimeve ka diferenca të pa kuptueshme, të pa shpjegueshme, atëherë qytetari duhet t’i nënshtrohet një procesi administrativ të investigimit. Nëse në fund të tij rezulton me pikëpyetje të pasqaruara, shkon dhe jep llogari më tej. Çdo qytetar kush merr frymë në një republikë normale duhet të deklarojë të ardhurat dhe shpenzimet. Në Shqipëri ne këtë e kemi kërkuar për politikën, për administratën e lartë shtetërore dhe për gjyqësorin. Tashmë ne po e zgjerojmë këtë kërkesë të personave që kanë llogari shumë të mëdhaja të pashlyera në këtë vend. Nuk arrij dot ta kuptoj këtë shqetësim, i cili po fryhet nga një pjesë e kufizuar e atyre që kanë një zë publik por qetësinë për të vijuar më tej na e jep mbështetja jashtëzakonisht e gjerë e publikut. Faleminderit!