Postuar më: 19 Janar 2018

Ministri Xhafaj i ftuar në emisionin “Kapital” VIDEO

Dokumentat e bashkëngjitura

Ministri i Brendshëm Fatmir Xhafaj ishte i ftuar sonte në emisionin "Kapital" nga Aleksandër Furxhi, në Vizion Plus. Intervista e plotë VIDEO:

Aleksandër Furxhi: Kur secili nga ne pyet veten nëse jeton më mirë apo më keq se dje, ose kur gjykojmë se ku jetohet më mirë, dy janë kriteret që na çojnë më shpejt tek përgjigja, e para është gjendja ekonomike dhe e dyta është siguria e jetës dhe e pronës. Dhe në çdo shtet për të siguruar jetën dhe pronën, ka një Ministri të Brendshme, ka një Polici të Shtetit. Sot i ftuar në ‘’Kapital’’ është Ministri i Brendshëm Z. Fatmir Xhafaj.  Mirëmbrëma!

Ministri Xhafaj: Mirëmbrëma, mirë se ju gjeta!

Aleksandër Furxhi: Z. Ministër një studim i publikuar këto ditë në Shqipëri, tregon se Shqipëria është një ndër vendet e sigurta në Europë dhe nivel botëror dhe kriminaliteti është i ulët. Është një studim i bërë nga një kompani private, një shoqëri jofitimprurëse, gjithsesi e kuotuar dhe të cilës i referohen shpesh edhe mediat e rëndësishme botërore. Ky studim me këto të dhëna, sigurisht është një vlerësim për ministrinë tuaj dhe punën tuaj, por ju e dini që publiku më shpesh dhe më i ndjeshëm është ndaj gjërave të tjera, ndaj atyre që ngjallin më shumë sensibilitet negativ, vrasje apo krime të rënda. A mund të bëni një koment për këto dy konstatime që sapo bëra?

Ministri Xhafaj: Së pari është kënaqësi që jam sonte në “Kapital” për shkak se u bë një kohë e gjatë që kam munguar, dhe që trajtojmë një çështje të tillë kaq të rëndësishme siç është çështja e sigurisë së jetës, e pronës së qytetarëve. Në vlerësimin tim, por jo thjesht në vlerësimin tim, në vlerësimin e opinionit publik edhe në vlerësimin e organizmave ndërkombëtare që merren me këtë çështje, Shqipëria është një vend i sigurt për të jetuar dhe për të punuar.

Shqipëria është një vend i sigurt në kuptimin e sigurisë së jetës, në kuptimin e sigurisë së punës, në kuptimin e sigurisë për të bërë biznes.

Natyrisht nuk është një vend pa probleme. Por raporte të tilla siç përmendet ju, që lidhen me indeksin e krimit në Tiranë dhe Shqipëri, krahasuar me vende të tjera, natyrisht që janë pozitive edhe janë vlerësuese, por nuk janë të vetmet. Ka njëkohësisht edhe shumë raporte të tjera të organizmave ndërkombëtare që pohojnë një gjë të tillë. Fakti që në të gjitha sondazhet, në këto sonadazhet në vitet e fundit, Policia e Shtetit në perceptimin qytetar konsiderohet një ndër agjencitë më të besueshme, shumë më përpara gjykatave, shumë më përpara prokurorisë, shumë më përpara se vetë politikës dhe shumë institucioneve të tjera, është gjithashtu një tregues i këtij fakti dhe këto nuk janë vlerësime të bëra nga Ministria e Brendshme apo nga Policia e Shtetit, por janë vlerësime të bëra nga Bashkimi Europian. Ju përmendet që qytetarët janë të ndjeshëm ndaj disa ngjarjeve.

Aleksandër Furxhi: Qytetarët nuk janë të prirur të dëgjojnë vlerësimet pozitive, por janë më të prirur për të dëgjuar nëse ndodh një vrasje, nëse ndodh një grabitje, e mbajnë mend sigurisht, është edhe natyra njerëzore. E mbajnë mend më mirë...

Ministri Xhafaj: Normal, një ngjarje krijon shumë efekt, por edhe përdoret më shumë. Nga ata që i përdorin ngjarje të tilla, siç është zakonisht politika në radhë të parë, për arsye të interesave të politikës së ditës, por midis këndvështrimit që ka politika, apo që mund të kemi ne shpesh, përfshirë edhe ne apo mediat në përgjithësi dhe asaj që kanë qytetarët, ka një diferencë të madhe. Prioritare nuk është problemi themelor i një ngjarjeje. Një vrasje në vetvete, padyshim ka vlerën, ka rëndësinë e saj dhe ka peshën e saj në jetën dhe sigurinë e tyre, por është më shumë jeta e përditshme. Dhe unë, po iu marr një sondazh, i pa publikuar ende, që është bërë për shembull në Elbasan. Më lejoni vetëm të marr Elbasanin. Elbasani sot është temë e ditës dhe është e vërtetë që aty ka disa probleme që lidhen krimin dhe në mënyrë të veçantë me disa grupe kriminale. Po marr perceptimin. Është tjetër ajo çfarë ne duam të dixhitalizojmë në mendjen e njerëzve dhe është tjetër që, duam ta devijojmë, apo ndryshojmë perceptimin dhe është ajo çfarë ndjejnë realisht qytetarët.

Aleksandër Furxhi: Çfarë tregon ai studim dhe kush e ka bërë?

Ministri Xhafaj: Këtë e kanë bërë organizmat ndërkombëtare. Është nën kujdesin e prezencës së OSBE-së. Siguria në zonat e ndryshme të qytetit, do të bëhet publike shumë shpejt dhe na është sjellë për ta parë.

Në qendër të qytetit ditën, rreth 78% e qytetarëve mendojnë që është i sigurt. Natën, 55% në qendër të qytetit. Shumë mirë. Nuk po them ata që e mendojnë mesatare. Që të gjitha këto, kapin 70-80% të qytetarëve, që në atë qytet e mendojnë në këtë mënyrë. Po kështu kur kjo është parë në lagje ditën, në lagje të caktuara, natën. Ditën në shtëpi, natën në shtëpi. Në parqet e qytetit, në zonat e caktuara të qytetit etj.

Pra ka një diferencë të madhe ndërmjet asaj që ndjejnë qytetarët dhe asaj që duam ne të trajtojmë si të tillë. Për shembull, flitet për vrasjet. Po dini, që t’iu them që sipas statistikave, 2017 po të merrja thjesht statistikat në vetvete, ka në të gjitha pikëpamjet treguesit më të mirë të kriminalitetit në të gjithë vitet e fundit dhe në disa raste ka treguesit më të ulët në 27 vite. Është numri më i ulët i vrasjeve. Është numri më i ulët i vrasjeve, është zero me eksploziv vitin e kaluar. Numri më i ulët i vjedhjeve me dhunë apo me armë në 27 vite. Apo numri i aksidenteve dhe pasojave me humbjen e jetës në këto aksidente. Janë shifrat e 2017 dhe shifrat janë kokëfortë. Shifrat janë të ftohta. Por unë nuk i shikoj si çështje, unë që jam Ministër i Brendshëm. Po të ishte sot, çfarë do të kisha bërë? Do të kisha dalë në fillim në janarit dhe do të thosha: Sukses! Ajo që unë shikoj është një gjë tjetër. Edhe 10 vrasje, jo 50 që është shifra më e ulë. Edhe 10 edhe një edhe dy janë një problem për mua. Dhe unë nuk e shikoj krahasuar nga pikëpamja statistikore, por nga nevoja për t’u përmirësuar gjithnjë e më mirë, jeta dhe siguria e qytetarëve.

Aleksandër Furxhi: Z. Ministër, Vettingu në polici. A ka qenë një ide personale e juaja dhe si lindi?

Ministri Xhafaj: Mendoj që Vetting-u në polici ka qenë një ide e formësuar që gjatë momentit që drejtoja Reformën në Drejtësi. Ndërkohë zhvillimet e fundit në Policinë e Shtetit, zhvillimet e vitit 2016 dhe pastaj ato të vitit 2017, por edhe njohja më nga afër e problematikës që ka policia, rolin, problemet e brendshme të saj dhe nevoja për ta forcuar atë si një agjenci të rëndësishme ligjzbatuese, çuan në këtë angazhim publik për të realizuar një proces vlerësimi brenda radhëve të Policisë së Shtetit.

Aleksandër Furxhi: Nuk është dëgjuar dhe gati është si e padëgjuar ndonjëherë, Vetting-u kaq thellë për punonjësit e policisë. Madje ka edhe komente të tilla që thonë, që sikur të bëhej seriozisht, nuk do të mbetej këmbë njeriu në polici!

Ministri Xhafaj: Nuk besoj se është kështu, jo. Unë nuk e besoj që është kështu, sepse njoh...

Aleksandër Furxhi: Sepse siç e thamë, historia e tre dekadave, ka plot histori me policë dhe shefa që në fund...

Ministri Xhafaj: Po, dakord, përtej historive të veçanta, apo historive të mediatizuara për X apo Y person, apo për grupe të caktuara personash, unë mendoj që në radhët e Policisë së Shtetit ka burra dhe gra, djem dhe vajza që plotësojnë më së miri, të gjitha standardet që lidhen me integritetin moral dhe profesional për të qenë pjesë e kësaj agjencie të rëndësishme ligjzbatuese.

Por duhet të bëjmë një logjikë të rëndësishme, ne i hymë një procesi që lidhej me vlerësimin, me Vettingun, me pastrimin në radhët e gjyqësorit dhe prokurorisë nga elementë të korruptuar, të inkriminuar dhe pa aftësitë e nevojshme profesionale. Dhe kur flasim për drejtësi penale, janë shumë të rëndësishme prokuroria dhe gjykata, por është po aq e rëndësishme një agjenci tjetër, e cila nuk është pjesë e sistemit të drejtësisë, është një agjenci ekzekutive, por pa ekzistencën, pa rolin, pa kontributin e saj është e pamundur që të ketë sukses në drejtësinë penale.

Aleksandër Furxhi: Që është?

Ministri Xhafaj: Që është policia. Pra, ndërsa ne arritëm dhe ndërtuam një proces Vettingu në radhët e gjyqtarëve dhe prokurorëve, i cili unë besoj do të jetë një proces i suksesshëm dhe ne shumë shpejt do të shohim rezultate konkrete dhe do të bindemi për rëndësinë, vërtetësinë dhe ndershmërinë e qëllimit të këtij procesi, ashtu e kemi po aq të nevojshme, për ta bërë këtë proces në radhët e policisë.

Pse? Sepse të dhëna të shumta tregojnë që në radhët e Policisë së Shtetit ka edhe policë që janë të inkriminuar, të korruptuar, ka gjithashtu dhe jo pak punonjës policie që janë të paaftë ose që kanë përfituar një karrierë të padrejtë, në kundërshtim shpeshherë edhe me ligjet. Për këto arsye, është e domosdoshme për të realizuar një proces të tillë, siç është Vetting-u në radhët e Policisë së Shtetit, të Shërbimit të Çështjeve të Brendshme dhe Ankesave, i cili është organi që kontrollon Policinë e Shtetit dhe në radhët e Gardës së Republikës, gjithashtu.

Aleksandër Furxhi: Kur thoni që në radhët e policisë ka edhe individë të tillë, ju i keni të identifikuar, apo mendoni se dukuritë apo ngjarjet të çojnë te përfundimi që disa prej punonjësve tuaj janë të tillë? Keni bërë lista?

Ministri Xhafaj: Jo absolutisht. E para, ne kemi bërë një analizë të plotë të këtij fenomeni. Së dyti, ka raporte, analiza të shumta në vijimësi. Së treti, ka pretendime ose ka dyshime të ngritura edhe nga agjenci të tjera ligjzbatuese, por edhe nga vetë opinioni publik për punonjës policie të tillë. Të gjitha këto arsye e bëjnë të domosdoshme.

Dhe ne menduam që të ndërmarrim një proces të tillë si nevojë për të mbështetur pjesën e shëndetshme të punonjësve të policisë që plotësojnë të gjitha kushtet e integritetit moral dhe profesional dhe për ta pastruar atë nga ata që nuk i përmbushin këto standarde.

Aleksandër Furxhi: Në qoftë se Vettingu në fushën e drejtësisë dihet dhe parashikohet që do të zgjasë rreth 5 vjet, po Vettingu në radhët e policisë?

Ministri Xhafaj: Vettingu në radhët e policisë, maksimumin e tij, mund ta kapë në harkun e dy vjetëve, dhe është i ndërtuar në 3 faza. Faza e parë është Vettingu, për rreth, rreth 300 oficerë, që janë drejtues me grada të larta. Fillimisht niset me këtë 300-she, i nënshtrohen Vettingut, pjesa më e lartë e Policisë së Shtetit.

Aleksandër Furxhi: Vetingu i policisë ka parasysh aftësitë profesionale, anën morale...

Ministri Xhafaj: ...ka parasysh korrupsionin, ka parasysh lidhjet e mundshme kriminale dhe ka parasysh edhe aftësitë profesionale.

Aleksandër Furxhi: Por nuk hyn te pjesa e pasurisë...

Ministri Xhafaj: Patjetër, kur themi korrupsioni, pjesa e pasurisë sepse në qoftë se ke...

Aleksandër Furxhi: Do të hetohen edhe për pasurinë që kanë?

Ministri Xhafaj: Absolutisht po, se është e pashpjegueshme të jesh me një rrogë polici dhe të kesh kompani private, të kesh bërë biznes, apo të kesh pasuri të tilla të dukshme dhe të padukshme, që kalojnë me qindra herë, shumëfish, rrogën e  zakonshme të policisë.

Aleksandër Furxhi: Ose duhet t’i justifikosh në qoftë se thua që m’i ka dhënë paratë vëllai, psh., ose kunati, apo baxhanaku!

Ministri Xhafaj: Sigurisht që po.

Aleksandër Furxhi: Në çfarë faze është tani Vettingu?

Ministri Xhafaj: Sapo kemi përmbyllur paketën ligjore. Kemi bërë një proces konsultimi me të gjithë faktorët, përfshirë dhe partnerët ndërkombëtarë që do të jenë pjesë e këtij procesi. Projekti do të kalojë shumë shpejt në Këshillin e Ministrave dhe besoj unë në fundin e këtij muaji do të jetë për shqyrtim në Kuvendin e Shqipërisë, në formën e një ligji, sigurisht.

Aleksandër Furxhi: Pra Vettingu do të jetë me ligj?

Ministri Xhafaj: Absolutisht me ligj. Është i përfunduar teksti që në dhjetor. Thjesht është shtyrë në kohë për shkak të procesit të konsultimit që ne kemi zhvilluar me aktorë të ndryshëm, me profesionistë të kësaj fushe. E së pari njëherë, vetë brenda radhëve Policisë së Shtetit, me aktorë të shoqërisë civile që janë të angazhuar në këtë fushë, edhe me partnerët ndërkombëtarë natyrisht.

Aleksandër Furxhi: Z.Ministër, rindërtimi i imazhit të policisë sigurisht është një nga synimet e Vettingut por edhe i gjithë punës tuaj praktikisht, është një sfidë. Me këto që kemi dëgjuar, me çfarë theksuam që ka, siç e pranuat edhe ju, elementë apo segmente të korruptuar në radhët e policisë, gjë që nuk na çudit më. Por ku e mbështesni ju besimin, është pyetja për ta rindërtuar imazhin e policisë së ndershme dhe të përkushtuar ndaj ligjit? Këta janë policët, këta janë njerëzit, këta jemi ne. Nga del ky besim?

Ministri Xhafaj: Unë kam një pikëpamje krejt të ndryshme me këtë çështje. Shpesh herë ne themi, po këta janë gjyqtarët, këta janë prokurorët, këta janë policët, në fund fare themi dhe këta janë politikanët. Por këta nuk janë gjithë shqiptarët.

Unë besoj që brenda radhëve të qytetarëve shqiptarë, djemve dhe vajzave në Shqipëri, gjenden plot djem dhe vajza që mund të shërbejnë shumë mirë, me shumë integritet, edhe si gjyqtarë, edhe si prokurorë, edhe si policë në këtë vend. Është shumë e rëndësishme të ndërtojmë një proces të tillë që u jep atyre besimin se duke qenë në radhët e këtyre institucioneve, duke qenë në radhët e këtyre organizatave, mund të jenë njerëz të vlerësuar dhe të respektuar. Natyrisht nëse bëhet fjalë për një organizatë ku vlerësohet i korruptuari, ku vlerësohet ai që nuk plotëson standardet për të qenë pjesë e asaj strukture, pa dyshim do vijnë gjithmonë e më pak njerëz. Sa më i mirë të bëhet ky proces, aq më shumë djem dhe vajza do të kenë mundësi të vijnë në këtë organizatë.

Ky proces pikërisht këtë synon, që të forcojë pjesën e shëndetshme brenda radhëve të Policisë së Shtetit dhe të sjellë prurje të reja në Policinë e Shtetit që plotësojnë këto kritere për të qenë anëtarë të kësaj organizate. Gjë që pa dyshim do të sjellë një agjenci të zbatimit të ligjit shumë më korrekte në respektimin dhe zbatimin e ligjit dhe tërësisht në shërbim të interesave të qytetarit.

Besoj ky është një proces që do ta ndihmojë shumë forcimin, integritetin brenda radhëve të policisë por nga ana tjetër do të rrisë shumë besueshmërinë e qytetarit te policia. Kjo është njëra anë, meqë më pyete.

Nga ana tjetër, ne jemi përfshirë në një sërë reformash shumë të rëndësishme në Policinë e Shtetit, ose më saktë një proces riformues të të gjithë veprimtarisë hetimore, ose ndryshe asaj që quhet zakonisht, Policisë Kriminale. Sipas gjykimit tonë, kjo është një nga pikat më të dobëta që ka Policia e Shtetit. Nga ana tjetër jemi përfshirë edhe në një proces të rëndësishëm ristrukturimi të të gjithë Policisë së Shtetit në nivel vendor, duke e organizuar atë më mirë për të pasur një kontroll më të mirë të territorit dhe mbi të gjitha një marrëdhënie krejt ndryshe me qytetarin.

Ne synojmë që të ketë më pak punonjës policie në zyra dhe më shumë punonjës policie në terren. Që çdo qytetar nesër me këtë projekt do të njohë kush është oficeri i policisë që mbulon zonën e tij. Çdo familje, çdo qytetar do të dijë se cili është punonjësi i policisë që mbulon atë territor, i cili përgjigjet për sigurinë e jetës dhe pronës së tij. Qytetarët nesër do të votojnë. E para një herë, drejtuesit e policisë do të jenë llogaridhënës përpara komunitetit, për atë çfarë bëjnë dhe për gjendjen e kriminalitetit në territor dhe do të jenë qytetarët ata që do të shprehen për drejtuesit e policisë në nivel qarku, për drejtuesit e policisë në nivel komisariati dhe për punonjësin e policisë së zonës, nëse ai duhet të jetë apo nuk duhet të jetë në shërbim të atij komuniteti.

Aleksandër Furxhi: Si dikur kur kemi pas njohur të gjithë policin e lagjes...

Ministri Xhafaj: Nuk e di në çfarë sensi e thatë atë, por edhe nëse ka qenë negative nuk ka asgjë të keqe. Por ky është sot një mënyrë qasje që e aplikojnë shumë vende europiane dhe me shumë sukses. Ne besojmë që i gjithë ky proces, pra Vettingu nga njëra anë, ristrukturimi i disa funksioneve të rëndësishme të Policisë së Shtetit dhe një qasje e re, një marrëdhënie e re e vendosjes në territor dhe e komunikimit të policisë me qytetarin, shto kësaj edhe disa rezultate konkrete që do të kemi në luftën kundër krimit besojmë që do t’i japim organizatës së policisë një nivel tjetër, akoma më të lartë se sot, besueshmërie tek qytetarët.

Aleksandër Furxhi: Cilat janë rezultatet konkrete që prisni? Cilat janë objektivat konkrete? Janë disa dosje që publiku pret rezultate konkrete.

Ministri Xhafaj: Së pari më duhet t’iu them, jo në vlerësimin e punës time dhe them në mënyrë shumë, shumë të sinqertë, por në vlerësim të atyre qindra oficerëve të policisë që punojnë me vetëmohim dhe me përkushtim në luftën me krimin në të gjithë territorin e vendit, që viti 2017 shënon një ndër vitet me rezultatet, të shprehura në shifra konkrete nga ndër më të mirët të viteve të fundit. Siç ishte lufta antikanabis, me krimet kundër jetës, krimet kundër pronës dhe një sërë treguesish të tjerë.

Natyrisht, ne dhe unë në radhë të parë në funksionin e Ministrit të Brendshëm, jemi shumë të përgjegjshëm se mbetet akoma më shumë për të bërë. Dhe ka disa gjëra që duhet të na preokupojnë siç është në radhë të parë lufta kundër grupeve kriminale, hetimi i krimit ekonomik dhe financiar, abuzimet, korrupsioni në zyrtarët e shtetit. Dhe së treti konsolidimi i rezultateve që kemi në kultivimin e kanabisit, rezultateve pozitive për ta hequr përfundimisht Shqipërinë nga harta e vendeve që kultivojnë kanabisin. Si dhe një funksion, një angazhim shumë më i mirë i Policisë së Shtetit në funksionin e saj parandalues në moshat e reja dhe kryesisht në krimet që lidhen me familjen.

Aleksandër Furxhi: T’ju bëj një pyetje disi më konkrete. Ju e dini që në opinion dhe në media tërhoqi vëmendjen për njëfarë kohe fakti që ish-drejtori i Policisë Haki Çako e mbajti postin aq gjatë edhe pasi erdhët ju me ekipin tuaj. Kjo u duk si një gjë e çuditshme, por në fund ai u largua. Si shpjegohet? Ka njerëz që pyesin në opinion, që z.Çako qëndroi në detyrë në një kohë që disa drejtues të Policisë ishin shpallur në kërkim, në një kohë që segmente jo të parëndësishëm të Policisë  së Shtetit ishin ku më shumë e ku më pak të njollosur me hashashin, me kanabisin etj.

Ministri Xhafaj: Së pari unë nuk shkova në Polici për të zëvendësuar disa drejtorë me disa drejtorë të tjerë. Nuk është as në logjikën time të punës kjo gjë. Nëse nuk ka arsye bindëse për ta bërë një gjë të tillë – siç ndodhi në rastin e drejtorëve të policisë së qarqeve gjatë pjesës së parë të mandatit tim që lëvizën. Sipas meje, ishte një lëvizje e drejtë dhe për aq sa mundësi dhe shtrirjen kohore, ishte një lëvizje minimale ndoshta. Me fillimin e mandatit të ri do të duhej të kisha një analizë më të plotë, për të kuptuar se cilat ishin problematikat dhe se cila do të duhej të ishte qasja dhe zgjidhjet konkrete përfshi këtu dhe ndryshimet e nevojshme për aq sa mua më takon mbi bazë të Kushtetutës dhe të ligjit në lidershipin e Policisë.

Aleksandër Furxhi: Në media është folur përplasje e Kryeministrit me Ministrin e Brendshëm për emrin e z.Çako. Mund ta përgënjeshtroni një gjë të tillë. Apo ka pasur një debat që dhe mund të ketë pasur?      

Ministri Xhafaj: Në media fliten shumë gjëra. Unë nuk di që të ketë pasur. Nëse ka dikush që e di mund ta thotë. Por di që kur unë e çova kandidaturën e z.Çako për të lëvizur nga funksioni i Drejtorit të Përgjithshëm i Policisë së Shtetit, qeveria e miratoi. Tani jemi në fazën do të duhet të përzgjedhim një drejtor të ri të Policisë së Shtetit. Arsyeja ndër të tjera dhe padyshim kryesorja është fakti që, ne në këto momente, për shkak të disa prioriteteve të rëndësishme dhe nevojës për të pasur më shumë, ritëm, dinamizëm në Policinë e Shtetit të rolit dhe funksionit të saj, kishim nevojë edh e për një lloj ritmi të ri në menaxhimin. Kjo padyshim është një nga arsyet, ose një nga qëllimet për të cilën është bërë kjo lëvizje në radhët e drejtuesve të Policisë së Shtetit. Shpresoj që nuk do të jetë veprimi i vetëm në këtë aspekt.

Aleksandër Furxhi: Do të kemi dhe të tjera.

Ministri Xhafaj: Në momentin e përshtatshëm, kur drejtori i ri të vijë në atë detyrë do ta gjykojë besoj, edhe mbi bazën e analizës që është bërë apo mbi bazën e argumenteve dhe mbi bazën e fakteve, nëse ka nevojë për lëvizje të tjera dhe besoj unë se ka do të duhet të bëhen.

Aleksandër Furxhi: Ka qarkulluar në media një raport i Shërbimit Informativ sipas të cilit 128 punonjës të policisë paskëshin qenë të lidhur me krimin e të tjera. Çfarë bëhet me të dhënat e këtij raporti? A është një raport me të cilin ju jeni marrë dhe e keni pasur parasysh raportin e Shërbimit Informativ Shtetëror. Kështu qarkullon në shtyp.

Ministri Xhafaj: Unë disponoj të gjitha raportet që Shërbimi Informativ Kombëtar ka hartuar dhe ka dërguar pranë meje si Ministër, që nga dita e parë që unë kam qenë Ministër i Brendshëm. Për hir të së vërtetës gjatë periudhës që kam punuar me ish-Drejtorin, z.Visho Ajazi kam patur një marrëdhënie shumë korrekte institucionale dhe kemi punuar ngushtësisht bashkë në përputhje me funksionet tona kushtetuese dhe ligjore, duke ndërtuar shpeshherë edhe operacione të përbashkëta, që besoj se kanë qenë të suksesshme ose që janë ende në proces. Natyrisht kemi patur dhe shkëmbim intensiv informacionesh për çështje që kanë të bëjnë edhe me problematika, që mund të ketë pasur edhe brenda agjencive tona respektive. Të njëjtën marrëdhënie kam pasur dhe kam ndërtuar edhe me zëvendësin e tij që është në detyrë, me z.Bendo, me të cilin jemi duke punuar ngushtësisht. Në vlerësimin tim është një person serioz, korrekt.

Jemi duke punuar ngushtësisht dhe me partnerët ndërkombëtarë për të bërë gjëra të mira në funksionet respektive.

Aleksandër Furxhi: Po raporti që ke?

Ministri Xhafaj: Ndërkohë më duhet të them që kam caktuar një grup pune që po studion të gjitha llojet e raporteve, që Shërbimi dhe jo vetëm Shërbimi Informativ, por dhe agjenci të tjera, përfshi dhe ato çfarë mund të kenë ardhur dhe nga qytetarë të ndryshëm, për t'i identifikuar, për t'i evidentuar dhe ato do të jenë pjesë e dosjeve të çdo punonjësi policie në procesin e Vettingut.

Raste dukshëm që rezultojnë me prova bindëse për punonjës të caktuar policie, për implikime të tyre, unë nuk kam hezituar dhe nuk do të hezitoj asnjëherë për të ushtruar brenda kufijve të mi ligjor të gjithë presionin e nevojshëm, autoritetin e duhur për të reaguar përmes hetimit administrativ dhe hetimit penal.

Mjafton t'ju kujtoj që gjatë kësaj periudhe të shkurtër është ndoshta numri më i madh i masave disiplinore të marra ndonjëherë në radhët e Policisë së Shtetit; dhe të çuara njëkohësisht në përgjegjësi penale.

Aleksandër Furxhi: Opozita vijon sulmin ne emrin tuaj personal, sulmet personale; nuk është hera e parë do të thoni ju që një Ministër i Brendshëm sulmohet edhe personalisht si i lidhur me krimin, me drogën etj. Si ndikon në punën tuaj, shkurtimisht kjo fushatë, këto lloj sulmesh? A arrijnë t'ju shkëpusin vëmendjen?

Ministri Xhafaj: Gjë normale. Puna e Ministrit të Brendshëm dhe Ministrisë së Brendshme, Policisë së Shtetit të jenë në vëmendjen e opinionit publik dhe për më tepër të opozitës. Deri këtu nuk ka asnjë gjë anormale.

Pastaj, pjesa që ka të bëjë me sulmet e motivuara politikisht apo me përpjekjen për të shpifur apo për të hedhur baltë, kjo është një gjë tjetër. Dhe kjo është një gjë, që të jem i sinqertë nuk më pengon fare në punën time, por përkundrazi më bën akoma më shumë të motivuar dhe shumë më të përgjegjshëm në detyrën time.

Natyrisht që i përbuz dhe nuk kam asnjë lloj ndjesie për akuza të kësaj natyre dhe për më tepër për individë të tillë. Unë kam fatin që kam një kohë të gjatë në Parlament dhe kam parë e kam dëgjuar shumë gjëra. Për fat të mirë, jam shumë i lumtur që nuk bëj pjesë në këtë kategori njerëzish që e kanë përdorur gjuhën pa doganë.

Kam parë aty njerëz që kanë pështyrë dhe kanë lëpirë brenda ditës, jo më në vite për atë çfarë kanë thënë dhe kanë ngritur akuza, në vite e vite të tëra kjo histori. Nga ana tjetër, me thënë të drejtën kur e shoh këtë tek disa njerëz, fillimisht kam pasur njëfarë impresioni vitet e para.

Tashti kur shikoj se cilët janë dhe çfarë përfaqësojnë në vetvete, me thënë të drejtën nuk kam asnjë lloj ndjesie dhe dua të shtoj, tani për më tepër, që jam në funksionin e Ministrit të Brendshëm dhe i njoh pak më mirë ata dhe çfarë përfaqësojnë në vetvete, shpeshherë ndiej një lloj përçmimi.

Aleksandër Furxhi: Në muajin shtator ju u përgjigjët, u duk në mënyrë përfundimtare, kur mbajtët fjalën si Ministër sapo kishit marrë detyrën, për çështjen e sulmeve ndaj familjes suaj, ndaj vëllait tuaj. Megjithatë opozita edhe këto ditë nuk ka hequr dorë, para dy ditësh, kryetari i PD-së Basha, përsëriti në një takim me militantët e PD, përsëri ka thënë ‘Edi Rama, Fatmir Xhafaj, këta ende zëvendësojnë klanin e Habilajt me klanin e Agron Xhafajt?

Ministri Xhafaj: Z. Basha duhet të përpiqet të bëhet serioz në atë funksion të rëndësishëm që ka marrë përsipër të bëjë. E pashë. Dhe ajo që do të duhej të bënte një ligjvënës, një qytetar, nëse ka fakte, prova, cilado qofshin ato, duhet t’i adresojë për t’i dhënë gjithkujt përgjegjësinë përkatëse.

Natyrisht akuza të tilla janë tërësisht të motivuara politikisht dhe kanë vetëm një qëllim: të cënojnë emrin, figurën dhe atë çfarë unë bëj përditë, por që është një gjë që nuk ka asnjë ndikim në jetën dhe në punën time të përditshme. Natyrisht të artikuluara pikërisht edhe nga z.Basha janë një arsye më shumë për të mos i kushtuar vëmendjen më të vogël për disa arsye.

Dhe me thënë të drejtën unë jam ndër të paktët zyrtarë dhe ligjvënës në atë Parlament që nuk kam munguar në asnjë rast t’i përgjigjem, kur ka pasur, aq pak sa ka pasur, akuzave ndaj emrit dhe punës sime. Por unë nuk kërkoj ta ndaj dhe nuk e ndaj atë çfarë bëj çdo ditë dhe integritetin tim moral, përkushtimin tim dhe angazhimin tim ndaj punës, me askënd tjetër.

Aleksandër Furxhi: Z.Ministër, folët pak më përpara për luftën kundër kanabisit dhe rezultatet e vitit 2017, dhe ju thatë që mund të quhet një vit i suksesshëm në këtë aspekt. Megjithatë, me sa kuptohet, në Shqipëri ka ende sasi të depozituara, të fshehura, që kapen herë pas here, sa në breg të detit, sa nëpër skafe, apo kur mbërrijnë në Itali, apo në Greqi ndoshta. Ka ende shumë me sa duket kanabis në Shqipëri? Si ju rezulton nga informacionet që keni, sigurisht për shkak të detyrës?

Ministri Xhafaj: Kjo historia e kanabisit është trajtuar gjerë e gjatë, edhe me të drejtë, në media, sepse realisht ka qenë një shqetësim. Ka qenë një shqetësim, që nuk është shqetësim i një viti, ka të paktën 25 vjet që mbillet kanabis. Ka pasur dhe ka në këtë vend histori të shëmtuara lidhur me këtë fenomen. Mjaft të kujtoj periudhën kur kultivimi i kanabisit në zona të tilla si Lazarati apo Dukagjini në vitet kur PD ishte në pushtet, ishte një gjë e ligjëruar. Kanabisi ishte kthyer në një institucion që mbrohej nga shteti.

Aleksandër Furxhi: Kjo tashmë i takon historisë, le të flasim për aktualitetin...

Ministri Xhafaj: Nëse flasim për aktualitetin, viti 2017 shënoi ndarjen përfundimtare nga ky fenomen. Dhe kemi rezultatet më të ulëta në 27 vjet në kultivimin e kanabisit. Janë kaq minimale saqë janë të papërfillshme në historinë 25-vjeçare të këtij fenomeni në vendin tonë. Dhe po them sot që janë të papërfillshme me historinë apo me shembujt të kultivimit të kanabisit që ka në rajon dhe në Europë.

Aleksandër Furxhi: Këto sasitë që kapen herë pas herë dhe që i shohim edhe me pamje, të kapura në Itali, nuk janë të vogla z.Ministër!

Ministri Xhafaj: Përsëri po them, që janë ndër sasitë më të vogla të kapura në vite në Itali gjithashtu. Ato që janë aktualisht. Por edhe ne vetë këtu, kemi kapur sasi të konsiderueshme, që natyrisht lidhen me përmasat që mori ky fenomen gjatë vitit 2016. Dhe unë besoj që edhe njëfarë kohe ne do të vazhdojmë ta dëgjojmë këtë histori të kapjes së sasive të caktuara të kanabisit, për shkak se mund të ketë sasi të depozituara.

Por, besoj që 2018-a do të jetë viti i ndarjes gjithashtu, do ta konsolidojë këtë arritje të 2017-s dhe do të jetë viti i ndarjes përfundimtare me këtë fenomen të shëmtuar. Problemi më i madh lidhet me faktin se në këtë proces janë të implikuar fermerët, kishim toka të tëra, ku fshatarët në tokat e tyre drejtpërdrejt apo të dhëna në përdorim grupeve të caktuara kriminale, ishin të destinuara në funksion të këtij aktiviteti kriminal dhe ishin larguar nga kulturat bujqësore.

Kjo ishte një çështje shumë e dëmshme edhe në këtë aspekt. Aspekti tjetër i rëndësishëm ishte fakti që tek shumë të rinj krijoi idenë e mundësisë për të fituar lehtë, për t’u pasuruar lehtë në jetë dhe shpeshherë të rinjtë u bënë pjesë e grupeve të caktuara kriminale, për t’u përfshirë në këtë lloj aktiviteti.

Ndarja me këtë fenomen është një pikë kthese, një ndryshim shumë i rëndësishëm edhe në aspektin social që krijon kjo gjë dhe besoj që kemi bërë një gjë të madhe. Kur e thamë këtë në mars të 2017 shumë pak njerëz e besonin që do të ndodhte kjo. Jam shumë i sigurt, ashtu siç ndodhi edhe për reformën në drejtësi. Sot kemi një realitet tjetër. Një realitet që e pranojnë jo vetëm qytetarët shqiptarë atje ku jetojnë dhe punojnë, por e pranojnë edhe partnerët ndërkombëtarë të cilët e kanë asistuar dhe monitoruar rreptësisht këtë proces. Është kjo arsyeja që vetë Ministri i Brendshëm italian në një letër të përbashkët që i kemi dërguar para pak kohësh komisionerëve të Bashkimit Europian ka certifikuar këtë rezultat shumë pozitiv të vitit 2017.

Aleksandër Furxhi: "Forca e Ligjit" për goditjen e grupeve kriminale është gjithashtu një krijesë juaja, z.Xhafaj. Cilat janë shkurtimisht në mënyrë telegrafike rezultatet e operacionit deri tani? Përpara se t’ju pyes për rekrutimin e forcave të Task Forcës që keni caktuar posaçërisht që të merren me këtë operacion në mos gaboj (inserte).

Ministri Xhafaj: Po i dëgjoj insertet tuaja dhe me thënë të drejtën, pashë disa përsëritje dhe po mendoja: këtyre për të bërë dy inserte, iu është dashur aq orë edhe përsëri kanë gabuar, pasi i kanë përsëritur nga dy-tre herë. Ndërsa ju, për dy muaj kërkoni që ne të bëjmë atë që mund të mos jetë bërë për vite të tëra, ose për të kryqëzuar, nën Forcën e Ligjit dhe në provën e nevojshme grupe kriminale që nuk besoj se janë më të lehta se sa insertet që bëni ju.

Alesandër Furxhi: Cili ishte gabimi nëse mund ta shkëmbejmë?

Ministri Xhafaj: Përsëritët dy herë, atë çështjen e Vettingut, një herë te inserti i parë, një herë te inserti i dytë, por gjëra që ndodhin, nuk ka ndonjë problem të madh.

Alesandër Furxhi: Gjërat e rëndësishme edhe përsëriten, sigurisht.

Ministri Xhafaj: Po normal që të ngelen në kujtesë. Po përsëritja, mëmë e dijes. Na e kanë thënë këtë. E kemi mësuar që të vegjël.

Alesandër Furxhi: Keni thënë që keni 38 dosje....

Ministri Xhafaj: Unë nuk kam thënë gjë, e keni thënë ju. Në këtë rast po e thoni ju, unë nuk kam thënë gjë. Më thuaj atë që kam thënë unë, jo atë që doni ju të them.

Qeveria ku unë bëj pjesë ka miratuar një Plan Veprimi për luftën ndaj krimit të organizuar për të adresuar këtë fenomen dhe të fokusuar tek një operacion të quajtur “Forca e Ligjit”, i cili ka në fokus të tij goditjen, identifikimin dhe zbulimin e grupeve kriminale dhe ajo që është shumë e rëndësishme të aseteve kriminale. Pse ne e ndërtuam në këtë mënyrë këtë gjë? Për shkak, sepse ne konstatuam se agjenci të ndryshme duke punuar të shkëputura, pavarësisht bashkëpunimit apo marrëdhënies ndërmjet tyre, nuk ishin të mirë koordinuara, gjë që nuk e bënte efikas dhe rezultatin final, për shkak se nevoja për të koordinuar dhe për të bërë më efiçente të gjitha burimet që shteti disponon, çoi në këtë zgjidhje ose në këtë qasje për të krijuar pikërisht këto Task Forca, që në një nivel ndërinstitucional sigurojnë koordinimin e institucioneve të ndryshme ligjzbatuese, që me Kushtetutë dhe me ligj kanë për detyrë luftën kundër krimit të organizuar. Dhe në një nivel tjetër, përmes Fask Forcave që janë të natyrës operacionale, siguron ndërveprimin operacional për t’u përballur me këtë fenomen siç është krimi i organizuar.

Aleksandër Furxhi: Është thënë që janë 38 grupe kriminale...

Ministri Xhafaj: Jo, nuk e kemi thënë këtë gjë dhe nuk e ka thënë Ministria e Brendshme. Mund të jenë 28, 38 mund të jenë 48. Media e ka thënë. Duhet të sqaroj një gjë. Mua më vjen shumë mirë që ka një pritshmëri të lartë ndaj kësaj, që do thotë se besohet. Së dyti që është shumë e rëndësishme janë vetëm dy muaj që kur ka filluar i gjithë ky proces. Natyrisht nuk filloi nga zero, por ka vetëm dy muaj që po ndërtohet e gjithë kjo qasje e posaçme, e fokusuar në luftën kundër grupeve kriminale... (intervista e plotë, bashkëlidhur)